Cyfadran Wyddoniaeth

Gwyddoniaeth Cyffredinol

Yn ystod blynyddoedd 7, 8 a 9, mae’r disgyblion yn datblygu eu dealltwriaeth o wyddoniaeth drwy bynciau ymarferol a pherthnasol megis “Chefistry” – lle maent yn archwilio cysyniadau cemegol a biolegol drwy goginio – a “Trydan a Magnetedd”, lle maent yn dysgu am gylchedau trydanol, foltedd, cerrynt a phriodweddau magnetau. Trwy weithgareddau ymarferol, ymchwiliadau gwyddonol a thrafodaethau grŵp, maent yn meithrin sgiliau allweddol megis meddwl yn feirniadol, datrys problemau, gweithio’n annibynnol ac yn gydweithredol, yn ogystal â datblygu llythrennedd gwyddonol a rhifedd. Mae’r cwricwlwm yn annog chwilfrydedd, creadigrwydd ac ymholi, gan baratoi disgyblion i ddeall y byd o’u cwmpas a gwneud cysylltiadau ystyrlon rhwng gwyddoniaeth a bywyd bob dydd. Wrth astudio Gwyddoniaeth TGAU (Dyfarniad Dwbl), nid yw disgyblion yn derbyn gradd ar wahân ym mhob pwnc, ond yn hytrach un radd gyfunol sy’n cwmpasu Bioleg, Cemeg a Ffiseg.

Bioleg

Ar y cwrs TGAU, mae disgyblion yn archwilio sut mae organebau’n gweithio, yn tyfu ac yn rhyngweithio â’u hamgylchedd. Maent yn dysgu am gelloedd, systemau’r corff, etifeddiaeth, esblygiad ac iechyd, gan ddatblygu sgiliau ymchwilio, dadansoddi a gwerthuso gwybodaeth fiolegol mewn cyd-destunau bywyd go iawn. Mae Bioleg Safon Uwch yn archwilio systemau byw, o fiocemeg a strwythur celloedd i etifeddiaeth, ecoleg a ffisioleg ddynol. Mae disgyblion yn astudio pynciau fel bioamrywiaeth, homeostasis ac esblygiad, gyda modiwlau dewisol megis imiwnoleg, niwrobioleg neu anatomi cyhyrysgerbydol. Mae gwaith ymarferol yn ganolog i’r cwrs, gan feithrin sgiliau ymchwil ac adolygu sy’n berthnasol i astudiaeth bellach neu yrfaoedd ym maes iechyd, y gwyddorau bywyd neu’r amgylchedd.

Ffiseg

Fel rhan o gwrs TGAU, mae’r disgyblion yn archwilio grymoedd, egni, tonnau, trydan a’r bydysawd. Maent yn defnyddio dulliau gwyddonol i fesur, modelu ac esbonio ffenomenau ffisegol, gan ddatblygu sgiliau mathemategol a dadansoddol cryf. Mae Ffiseg Safon Uwch yn archwilio deddfau sylfaenol natur, o symudiad ac egni i drydan, tonnau, meysydd a ffiseg niwclear. Mae disgyblion yn astudio cymwysiadau go iawn drwy bynciau dewisol megis ffiseg feddygol, chwaraeon neu ynni a’r amgylchedd. Mae’r cwrs yn datblygu sgiliau mathemategol a datrys problemau cryf, gyda gwaith ymarferol yn cefnogi dealltwriaeth ac yn paratoi disgyblion ar gyfer gyrfaoedd ym maes gwyddoniaeth, technoleg neu beirianneg.

Cemeg

Ar gyfer TGAU, mae disgyblion yn dysgu am sylweddau a’u hymddygiad – gan gynnwys bondio cemegol, adweithiau, adnoddau’r Ddaear a chynaliadwyedd. Maent yn datblygu dealltwriaeth o sut mae cemeg yn berthnasol i’r byd modern, gan gynnwys cynhyrchu ynni, plastigion a dŵr glân.

Mae Cemeg Safon Uwch yn canolbwyntio ar strwythur mater, adweithiau cemegol, ac egwyddorion sy’n sail i brosesau diwydiannol a biolegol. Mae disgyblion yn astudio pynciau fel bondio, egni, cineteg, cemeg organig ac adweithiau ocsidiad. Mae’r cwrs yn cynnwys asesiadau ymarferol a dadansoddi data, gan baratoi dysgwyr ar gyfer astudiaeth bellach mewn cemeg, meddygaeth, peirianneg neu feysydd cysylltiedig.