Cyfadran Y Gymraeg

Yn ystod astudiaethau blwyddyn 7-9, mae disgyblion yn meithrin eu sgiliau Cymraeg drwy astudio themâu sy’n berthnasol i’w bywydau a’u hunaniaeth, megis “Fi fy hun”, yr ardal leol, yr ysgol, a chwedlau Cymreig fel Cantre’r Gwaelod a Branwen. Maent yn dysgu i fynegi barn yn glir, i drafod syniadau mewn grŵp, ac i ysgrifennu’n greadigol ac estynedig. Mae pwyslais cryf ar ddatblygu sgiliau llafar, darllen a chywirdeb ysgrifenedig, gan gynnwys treigladau, cyffelybiaethau, ansoddeiriau a strwythur paragraffau. Trwy astudio cerddi, testunau llenyddol a gweithgareddau trawsgwricwlaidd, caiff disgyblion eu hannog i feddwl yn feirniadol, i hunanasesu’n effeithiol, ac i ddefnyddio’r Gymraeg yn hyderus ac yn naturiol mewn amrywiaeth o sefyllfaoedd.

Yn ystod y cwrs TGAU, mae disgyblion yn datblygu rhuglder a hyder yn y Gymraeg drwy astudio testunau llenyddol a chyfoes, gan gynnwys cerddi, straeon byrion, nofelau a ffilmiau. Maent yn dysgu i ddadansoddi cynnwys, trafod arddull ac adeiladwaith testunau, ac i fynegi barn yn fanwl gan ddefnyddio tystiolaeth. Mae’r cwrs yn datblygu sgiliau ysgrifennu academaidd, trafod llafar mewn grŵp, a dealltwriaeth o themâu cymdeithasol, diwylliannol a moesegol. Trwy waith asesu ffurfiannol a chrynodol, caiff disgyblion eu paratoi ar gyfer sefyllfaoedd bywyd go iawn, gan gynnwys cyfathrebu mewn byd gwaith, addysg bellach, a chyd-destunau lleol a chenedlaethol. Mae’r Gymraeg fel pwnc craidd yn cyfrannu’n sylweddol at hunaniaeth, lles, a gallu disgyblion i gyfrannu’n hyderus i gymdeithas Gymreig gyfoes.

Yn y Chweched Dosbarth, mae’r disgyblion yn archwilio llenyddiaeth Gymraeg yn fanwl, gan ddadansoddi themâu, arddull a chyd-destun testunau amrywiol. Maent yn datblygu sgiliau dadansoddi beirniadol, ysgrifennu academaidd, a chyflwyno dadleuon soffistigedig. Mae’r cwrs yn meithrin dealltwriaeth ddyfnach o’r iaith a’r diwylliant Cymreig, gan baratoi disgyblion ar gyfer astudiaeth bellach neu fyd gwaith.